தலையெழுத்து
------------------------
முதல் பக்கத்தை
காணவில்லை
இரண்டாம் பக்கத்தை கிழித்துவிட்டேன்.
மூன்றாம் பக்கத்தில்
ஏகப்பட்ட எழுத்துப் பிழை
நான்காம் பக்கத்தில்
“ழ“வைக் காணோம்.
ஐந்தாம் பக்கத்தில்
பாய் இருக்கும் இடத்தில்
பேய் இருக்கிறது
ஆறாம் பக்கத்தில்
சாகும்வரை
உண்பதை நிறுத்தப் போவதில்லை
உயிரோடு இருக்கும் வரை
போராட்டம் நிற்கப் போவதில்லை.
எனக்கு எதிரிகள் உண்டு
அவர்களோடு உரசலும் உண்டு
எனக்கு நண்பர்கள் உண்டு
அவர்களோடு மோதலும் உண்டு.
தூங்கும் போதும் கனவில்
பேசிக்கொண்டிருப்பேன்
காதலிக்கும் ஆண்களோடு
ரகசியமாய் உரையாடுவேன் .
-------------------------------
முன்பொரு காலத்தில்
கணபதிக்கு சாப்பிடத் தெரியாது
அவன் சிறு வயது பிள்ளை என்பதால்
அம்மா அவனுக்கு ஊட்டிவிட்டாள்.
பின்பொரு காலத்தில்
கணபதிக்கும்
சித்ராவுக்கும்
திருமணம் ஆனது.
சில ஆண்டு கழித்து
கணபதிக்கு உஷை பிறந்தாள்.
------------------------------
மூச்சு முட்டுகிறது
உயிர் தப்பிக்கப் போராடுகிறேன்.
ஆயிரம் பிறை கண்ட
கழுதைகளுக்குத் தெரியாத
அர்த்தம் எனக்கு மட்டும்
புரியப் போவதில்லை.
இடுக்கில் மாட்டிக்கொண்ட
வாழ்க்கையை
நெம்புகோள் கொண்டு
வெளியே எடுக்க முயல்கிறேன்.
பார்க்க கேவலமாய்
இருக்கிறது.
